उद्योगको उत्पादन गिरावटले राजश्व लक्ष्यमा चोट

वीरगन्ज । उद्योगको उत्पादनमा आएको गिरावटले मुलुकको पहिलो सुख्खा बन्दरगाह भन्सार कार्यालयको राजश्व लक्ष्यमा चोट पुगेको पाइएको छ । सुख्खा बन्दरगाह भन्सारको राजश्व लक्ष्य पूरा गर्ने मुख्य मालबस्तुमा उद्योगका कच्चा पदार्थ आयातको महत्वपूर्ण योगदान हुने गरेको छ । तर उद्योगको उत्पादनमा आएको गिरावटले कच्चा पदार्थको आयात घट्दा त्यसको चोट भन्सारको राजश्व लक्ष्यमा परेको हो ।

पछिल्लो समय उद्योगको उत्पादनमा खस्किएको नेपाल उद्योग बाणिज्य महासंघका केन्द्रिय सदस्य सुबोध गुप्ताले बताए । कुल उत्पादन क्षमताको ३० देखि ४० प्रतिशत मात्र पनि अहिले उद्योगहरुको उत्पादन नभएको उनको दावी छ । यसको प्रत्यक्ष असर मुलुकको पहिलो सुख्खा बन्दरगाह भन्सार कार्यालयको राजश्वमा पनि देखिएको पाइएको हो ।