प्रहरी भवनको उद्घाटन, भक्तपुरमा तालिम केन्द्र बनाइने

भक्तपुर । भक्तपुरको सूर्यविनायक नगरपालिका–८, डोलेश्वरमा प्रहरी चौकी भवन निर्माण गरिएको छ । काठमाडौँ उपत्यका प्रहरी कार्यालयका प्रमुख प्रहरी अतिरिक्त महानिरीक्षक दीपक थापाले नवनिर्मित भवनको आज उद्घाटन गरे ।

अतिरिक्त महानिरीक्षक थापाले काठमाडौँ उपत्यकाको शान्ति सुरक्षाका लागि दक्ष जनशक्ति उपत्पादन गर्न भक्तपुरमा तालिम केन्द्र बनाउने तयारी गरेको बताए । उपत्यकाका बासिन्दाको शान्ति सुरक्षार्थ १२ हजार प्रहरी जवान क्रियाशील रहेको भन्दै उनले तिनीहरुको क्षमतावृद्धिका लागि तालिम कक्ष निर्माण आवश्यक भएकाले ८० रोपनी जग्गा निःशुल्क प्राप्तिका लागि आह्वान गरेको बताए ।