आत्मसमर्पण होइन, आत्मसम्मान चाहिन्छ: एमालेभित्र अनावश्यक तरंग नबनाउन ईश्वर पोखरेलको अपिल

काठमाडौँ । नेकपा (एमाले) नेता ईश्वर पोखरेलले पार्टीभित्र अनावश्यक तरंग सिर्जना नगर्न र विगतका त्रासदीपूर्ण अनुभवको ‘भूत’ बाट अहिले पनि डराइरहनु उपयुक्त नहुने बताएका छन् । हालै सम्पन्न एमालेको ११औँ राष्ट्रिय महाधिवेशनपछि पार्टीभित्र देखिएका बहस, प्रतिस्पर्धा र त्यसपछिका भेटघाटलाई लिएर सार्वजनिक भएका प्रतिक्रियाप्रति ध्यानाकर्षण जनाउँदै उनले पार्टी एकता, विधि र आत्मसम्मानको पक्षमा जोड दिएका हुन् ।

सोमबार सामाजिक सञ्जाल फेसबुकमार्फत सार्वजनिक स्ट्याटसमा पोखरेलले महाधिवेशनबाट निर्वाचित नेतृत्वका विरुद्ध कसैबाट पनि असंवैधानिक वा संस्थागत निर्णय विपरीत कुनै गतिविधि नहुने स्पष्ट पारेका छन् । विगतमा पार्टीभित्रका विवादले नकारात्मक र नोक्सानदायी परिणाम भोग्नुपरेको सन्दर्भ स्मरण गर्दै उनले अहिले त्यही भयबाट तरंगित हुनु उचित नहुने बताएका छन् ।