दाहाल पक्राउको कारण खुलेन, साइबर ब्युरोले काठमाडौंमा अनुसन्धान अघि बढाउने

विराटनगर- राजनीतिक विश्लेषक तथा त्रिमूल नेपालका अध्यक्ष भरत दाहाल मोरङको सुन्दरहरैँचाबाट पक्राउ परेका छन् । मोरङ प्रहरीका अनुसार दाहाललाई आइतवार बिहान सुन्दरहरैँचा नगरपालिका- ८ सलकपुरस्थित गौरी ढकालको चिया पसलबाट पक्राउ गरिएको हो ।

मोरङका प्रहरी प्रमुख प्रहरी उपरीक्षक कवित कटवालले काठमाडौं जिल्ला अदालतबाट पक्राउ पुर्जी जारी भएपछि साइबर ब्युरोको आग्रहमा दाहाललाई नियन्त्रणमा लिइएको जानकारी दिए । उनका अनुसार दाहाललाई आवश्यक अनुसन्धानका लागि आइतवार नै जहाजमार्फत काठमाडौं पठाउने तयारी गरिएको छ । ‘दिउँसो २ बजे जहाजमार्फत काठमाडौं पठाउने तयारी छ,’ प्रहरी उपरीक्षक कटवालले भने ।