दसैँ–तिहारपछि सरकारविरुद्ध आन्दोलन गर्ने भनेका दलहरूभित्रै बबन्डर

काठमाडौँ । दसैँ–तिहारपछि सरकारविरुद्ध सशक्त आन्दोलन गर्ने तयारीमा रहेका संविधान निर्माण पक्षधर प्रमुख दलहरू नै आन्तरिक विवादमा अल्झिएका छन् । राष्ट्रियता, लोकतन्त्र, संविधानको रक्षा र जनजीविकाको पक्षमा संयुक्त आन्दोलन गर्नेगरी तयारी गरेका प्रमुख प्रतिपक्ष दल नेपाली कांग्रेस, नेकपा एमाले, नेपाली कम्युनिस्ट पार्टी (नेकपा)मा आन्तरिक विवाद उत्कर्षमा पुगेको छ ।

तर, पूर्वप्रधानमन्त्री एवं नेकपाका संयोजक पुष्पकमल दाहाल ‘प्रचण्ड’ले दसैँ–तिहारपछि अवस्था हेरेर सरकारविरुद्ध संयुक्त आन्दोलन हुने दाबी गरे । असोज २ गते अखिल नेपाल किसान महासंघको केन्द्रीय समितिको पूर्ण बैठकलाई सम्बोधन गर्दै प्रचण्डले राष्ट्रिय स्वतन्त्र पार्टी (रास्वपा) नेतृत्वको सरकारविरुद्ध संयुक्त आन्दोलन गर्ने बताएका थिए ।