कोशी टप्पुमा पुष्पा र अञ्जलीको रखबारी

कोशी टप्पु, सुनसरी — हिउँदे घाम बिहानैदेखि पर-परसम्म फैलिएको थियो । तैपनि राति शीत परेका घाँसपात ओभाइसकेका थिएनन् । पुष्पा र अञ्जलीलाई घाँस चर्न कुनै पर्वाहै थिएन । पेट अघाउन्जेल चर्ने, पानी खाने अनि आराम गर्ने बिहानीको दैनिकीअनुसार खडेरीले सुकेका घाँसभित्र हरिया मुना सिला पार्नमै ध्यानमग्न थिए ।

यो दृश्य पुस दोस्रो साता कोशी टप्पु वन्यजन्तु आरक्षको पथरी सेक्टर पुग्दाको हो । पथरी सेक्टर महेन्द्र राजमार्गनेर पर्ने सप्तरीस्थित कंकालिनी मन्दिरदेखि १२ किमि उत्तरपश्चिमपट्टि त्रियुगा नदीको किनारमा पर्छ ।