दसैँ नजिकिँदा पनि रौतहटका १२ पालिकाको खाता खुलेन, सशर्त अनुदानको हिसाबमा उठ्यो प्रश्न

दसैँ–तिहार नजिकिँदै जाँदा रौतहटका अधिकांश स्थानीय तहको आर्थिक कारोबार प्रभावित हुने अवस्था देखिएको छ। गत आर्थिक वर्षको खर्च तथा अनुदानको हिसाब मिलान हुन नसकेपछि जिल्लाका १२ स्थानीय तहको खाता सञ्चालन र चालु आर्थिक वर्षको पहिलो किस्ता निकासा रोकिएको कोष तथा लेखा नियन्त्रक कार्यालय (कोलेनिका) ले जनाएको छ।

कोलेनिकाका अनुसार स्थानीय तहले स्रोतगत रूपमा खर्च व्यवस्थापन नगरेको, खर्च हुन नसकेको रकम समयमै फिर्ता नगरेको तथा अघिल्लो आर्थिक वर्षको वित्तीय विवरण मिलान हुन बाँकी रहेकाले चालु आर्थिक वर्षको निकासा प्रक्रियामा समस्या देखिएको हो।