सत्तरी वर्षमाथिका एक हजार बढी ज्येष्ठ नागरिकलाई सम्मान

भोजपुर । यहाँको रामप्रसाद राई गाउँपालिकाले ७० वर्षमाथिका ज्येष्ठ नागरिकलाई सम्मानसहित न्यानो कपडा वितरण गरेको छ । ‘हाम्रो साझा अभियान: ज्येष्ठ नागरिकप्रति श्रद्धा र सम्मान’ भन्ने आदर्श वाक्यका साथ शुक्रबार विभिन्न कार्यक्रम आयोजना गरी ज्येष्ठ नागरिक दिवस मनाएको हो ।

ज्येष्ठ नागरिक दिवसको अवसर पारेर पालिकाले मातहतका आठवटै वडाका ज्येष्ठ नागरिकलाई सम्मानसहित कपडा वितरण गरेको हो । पालिकाले आगामी दिनमा पनि वडावडामा पुगेर ज्येष्ठ नागरिकलाई सम्मान र कपडा वितरण गर्नेछ । पहिलो दिन पालिकामा गरिएको कार्यक्रममा ४५ जना ज्येष्ठ नागरिकलाई सम्मानसहित न्यानो कपडा प्रदान गरिएको गाउँपालिका अध्यक्ष थामबहादुर राईले जानकारी दिए ।