अनाथालयदेखि ओलम्पिक छात्रवृत्तिसम्म, तेन्जिङ बर्टिन राईको यात्रा

एउटा अनाथालयमा करिब २२ वर्ष अघि एक नवजात शिशु आफ्नो भाग्यबाट बेखबर निदाइरहेको थियो । उसलाई न त आफू कहाँ छ भन्ने थाहा थियो, न त भविष्यको कुनै खाका बारे ज्ञान । त्यो बालक समयसँगै आज तेन्जिङ बर्टिन राई बनेको छ । नेपाली स्पोट्र्स क्लाइम्बिङ इतिहासमै सबैभन्दा प्रेरणादायी र असाधारण नाम । उनको जीवनयात्रा केवल खेलकुदको सफलताको कथा मात्र होइन, यो त अभाव, पीडा, जोखिम र सपनाबीचको एउटा गहिरो मानवीय संघर्ष हो, जसले आज हजारौं नेपाली युवालाई “उचाइ” मा हेर्न बाध्य बनाएको छ ।

तेन्जिङको जीवनले सुरुवातमै उनलाई अनाथालयसम्म पु¥यायो । अनाथालय उनका लागि घर बन्यो, जहाँ उनले जीवनका पहिलो दुई वर्ष बिताए । कतिपय प्रश्नहरू आज पनि उनको जीवनमा अनुत्तरित छन् । तर, जीवनले कहिलेकाहीँ सबै उत्तरहरू कागजमा होइन, कर्ममा लेखिदिन्छ । त्यस्तै, एक दिन एकजना मनकारी व्यक्तिले धर्मपुत्रको रुपमा ग्रहण गर्दै त्यो दुई वर्षको बालकलाई आफ्नो काखमा समेटिन् । त्यही दिनदेखि एउटा बेवारिसे बालकले अभिभावक पायो । पहाड, हिमाल, चट्टानसँग पैंठेजोरी खेल्ने ट्रेकिङ गाइड पेशाका ती अभिभावकको छत्रछायामा हुर्केका तेन्जिङको बालमनमा पनि उचाइप्रतिको आकर्षण अंकुरित भयो । आठ वर्षको उमेरमा ती अभिभावकले उनलाई धुम्बाराहीस्थित पासाङ ल्हामु बाल क्लाइम्बिङ सेन्टरमा पु¥याए ।