भारतीय क्रिकेटमा नयाँ इतिहास: १५ वर्षे वैभवले तोडे सचिनको कीर्तिमान, श्रेयस बने नयाँ टी-ट्वान्टी कप्तान

काठमाडौँ । भारतीय क्रिकेट टोलीमा १५ वर्षीय युवा ब्याटर वैभव सूर्यवंशी छनोट हुने अहिलेसम्मकै सबैभन्दा कान्छा खेलाडी बनेका छन् । १५ वर्ष ७१ दिनको उमेरमा वैभवलाई आगामी जुन–जुलाईमा हुने आयरल्याण्ड र इंग्ल्याण्ड विरुद्धको टी–२० शृङ्खला तथा सेप्टेम्बरमा हुने एसियाली खेलकुदका लागि भारतीय टोलीमा समावेश गरिएको हो । यसै वर्षको फेब्रुअरीमा सम्पन्न अन्डर–१९ विश्वकपको फाइनलमा पुगेका वैभवले इंग्ल्याण्ड विरुद्धको खेलमा ८० बलमा १७५ रनको सानदार इनिङ्स खेलेका थिए ।

वैभवले पहिलो पटक राष्ट्रिय टोलीमा छनोट हुने क्रममा शेफाली वर्मा र सचिन तेन्दुलकरको कीर्तिमान तोडेका छन् । यसअघि पुरुष र महिला क्रिकेट मिलाएर शेफाली १५ वर्ष २२० दिनको उमेरमा छनोट हुँदा यो कीर्तिमान उनको नाममा थियो भने पुरुषतर्फ सचिन तेन्दुलकर १६ वर्ष १९४ दिनको उमेरमा छनोट भएका थिए । यदि वैभवले आगामी भ्रमण वा एसियाली खेलकुदमा एउटा मात्र खेल खेल्ने मौका पाए भने उनी शेफाली र सचिन दुवैलाई पछि पार्दै भारतका लागि डेब्यु गर्ने सबैभन्दा कान्छो खेलाडी बन्नेछन् । यद्यपि, विश्व क्रिकेटको सन्दर्भमा भने जर्सीकी निया चार्लोट ग्रेग (११ वर्ष ४० दिन) र रोमानियाका मारियन गेरासिम (१४ वर्ष १६ दिन) को नाममा सबैभन्दा कम उमेरमा अन्तर्राष्ट्रिय डेब्यु गर्ने कीर्तिमान रहेको छ ।