अभिभावकले बनाएको नमुना ज्ञानज्योति

मुठी दान र चन्दा उठाएर अभिभावकहरूले बनाएको तुलसीपुर उपमहानगरपालिका– ५ मा रहेको ज्ञानज्योति आधारभूत विद्यालय जिल्लाकै नमुना बनेको छ । यहाँ पढ्ने ४५० विद्यार्थीमध्ये अधिकांश गरिब, दलित तथा पिछडिएका समुदायका छन् । माध्यमिक विद्यालय बनाउने अभिभावकको चाहना छ, तर सरकारको नजर पुगेको छैन ।

दुई दशकअघिसम्म तुलसीपुर पातुखोलाका कलिला बालबालिका विद्यालय पढ्न टाढाटाढा धाउनुपर्थ्यो । गाउँमा विद्यालय नहुँदा आफ्ना लालाबाला शिक्षाबाट पछाडि पर्ने हुन् कि भन्ने चिन्तामा थिए, अभिभावक । त्यही चिन्ताले ०५८ सालमा जन्मायो, ज्ञानज्योति आधारभूत विद्यालय ।