हृदय जित्दै हृदयकर्मी

नेपाल पूरै बिग्रिएको छैन। चारैतिर भत्केको मात्र छैन। सबै विदेशिएर देशै रित्तिन लागेको कुरा पनि सही होइन। त्यसैगरी यहाँ बस्नेहरू सबै अक्षम, कामै नलाग्ने पनि हैनन्। यहाँ बस्नेहरूले निकै उत्कृष्ट कार्य गरिरहेका छन्। त्यसलाई हेर्न र मनन गर्नसक्ने मनको अहिले आवश्यकता छ। धेरैले इमान र जमान बचाएर आफ्नो प्रतिष्ठा आर्जन गरेका छन्। विशेषगरी शिक्षा र स्वास्थ्य क्षेत्रमा लागेका कैयन विशेषज्ञ र व्यक्तिहरू छन्, जसले उल्लेख्य परिवर्तन ल्याइरहेका छन्।

गंगालाल राष्ट्रिय हृदय केन्द्र यसको जिउँदोजाग्दो प्रमाण हो। जसले एक वर्ष अवधिमा एक हजार नौ सय ८२ जनाको मुटुको शल्यक्रिया सम्पन्न गरेको छ। त्यति मात्र हैन, बहिरंग सेवामार्फत मात्र एक लाख ९९ हजार नौ सय ७२ जनालाई सेवा उपलब्ध गराएको छ भने एक लाख २४ हजार दुई सय ४७ जनालाई इसिजी सेवा दिएको छ। त्यसबाहेक पनि आकस्मिक कक्ष, इको, इकोकार्डियोग्राम, कोरोनरी एन्जिओप्लास्टीजस्ता सेवामार्फ अन्य लाखौँको उपचार सम्भव भएको छ।