दुई नयाँ जलविद्युत्मा लगानी गर्ने चिलिमे हाइड्रोपावरको प्रस्ताव

नेपाल विद्युत् प्राधिकरणको बहुसंख्यक सेयर स्वामित्व रहेको चिलिमे हाइड्रोपावर कम्पनी लिमिटेडले सेती नदी–३ (एसआर–३) र बुढीगण्डकी प्रोक जलविद्युत् परियोजनामा लगानी गर्ने प्रस्ताव लगानी बोर्डसमक्ष पेस गरेको छ । कम्पनीले शुक्रबार बोर्डका प्रमुख कार्यकारी अधिकृत सुशील भट्टलाई प्रस्ताव पेस गरेको हो । अर्ध–जलाशययुक्त (सेमी स्टोरेज) प्रकृतिमा निर्माण प्रस्ताव गरिएको एसआर–३ जलविद्युत् परियोजनाको क्षमता ८७ मेगावाट र नदी प्रवाही (रन अफ द रिभर) प्रकृतिको बुढीगण्डकी प्रोक जलविद्युत् परियोजनाको क्षमता ८१ मेगावाट रहेको छ । बोर्डमा लगानी स्वीकृतिका लागि पेस भएको प्रस्तावअनुसार एसआर–३ को लागत १९ अर्ब ६६ करोड ६१ लाख रुपैयाँ र बुढीगण्डकी प्रोकको लागत १६ अर्ब ४५ करोड ५४ लाख रुपैयाँ रहने अनुमान छ ।

पश्चिम सेती जलविद्युत् परियोजनाको अपस्ट्रिम (माथिल्लो भाग)मा अवस्थित एसआर–३ परियोजना सुदूरपश्चिम प्रदेशको बझाङ जिल्लामा पर्छ । त्यस्तै, बुढीगण्डकी प्रोक जलविद्युत् परियोजना गण्डकी प्रदेशको गोरखा जिल्लामा पर्छ । लगानी बोर्डले गत भदौ २ मा भारत सरकार स्वामित्वको एनएचपिसी लिमिटेडसँग पश्चिम सेती (७५० मेगावाट) र एसआर–६ (४५० मेगावाट) विकास गर्ने गरी समझदारी गरेको थियो ।