व्यवसायीलाई सचेत गराउँदै म्याग्दी उद्योग वाणिज्य संघ

म्याग्दी उद्योग वाणिज्य संघले बेनी बजार क्षेत्रका उद्योगी–व्यवसायीलाई व्यावसायिक सचेतना तथा कानुनी मापदण्डबारे सुसूचित गराउने उद्देश्यले विशेष अभियान सञ्चालन गरेको छ। संघले बेनी नगरपालिका–७ र ८ का उद्योगी–व्यवसायीसँग प्रत्यक्ष भेटघाट गरी सचेतनामूलक पर्चा वितरणका साथै अभिमुखीकरण सुरु गरेको हो।

संघले तयार गरेको तालिकाअनुसार असोज ४ गते (आइतबार) बिहानदेखि सदरमुकाम बेनी बजार क्षेत्रका वडा नम्बर ७ र ८ मा एकैसाथ स्थलगत भेटघाट तथा पर्चा वितरण सुरु गरिएको हो। वडा नम्बर ७ मा संघका वरिष्ठ उपाध्यक्ष राजेश शाक्य र वडा नम्बर ८ मा प्रथम उपाध्यक्ष लिलाराम गौतमको नेतृत्वमा कार्यसमितिका पदाधिकारी तथा सदस्यहरूको टोली व्यवसायीको घरदैलोमा खटिएको संघले जनाएको छ।