असुरक्षित सुरक्षाकर्मी

कर्णाली प्रदेशका नागरिकको जीवनस्तर अन्तको भन्दा कमजोर छ। शिक्षा, स्वास्थ्य र भौतिक विकासमा पछाडि परेको यो प्रदेशमा राज्यका तर्फमा हुने उपस्थिति पनि कमजोर नै छ। झन् जनताको जिउधनको सुरक्षा गर्ने र शान्ति सुरक्षा कायम गर्ने कार्यादेश पाएको नेपाल प्रहरी आफैं यो प्रदेशमा असुरिक्षत हुनु बिडम्बना नै हो।

भौतिक पूर्वाधारका हिसाबमा यो प्रदेशका प्रहरी कार्यालयहरू, चौकीहरू निकै कमजोर र जीर्ण छन्। कैयौं ठाउँमा त प्रहरीका भवनसमेत छैनन्। भाडाका कार्यालयमा बसेर प्रहरी खटिएका छन्। प्रहरीका अधिकांश भवन र संरचनाहरू जीर्ण र जोखिमपूर्ण हुनु नागरिकलाई नै जोखिममा पार्नु हो।