बाढी–पहिरोले देशभरका मुख्य सडक प्रभावित

काठमाडौं । लगातारको वर्षापछि आएको बाढी र पहिरोका कारण देशका विभिन्न मुख्य राजमार्ग तथा सडकखण्डमा यातायात प्रभावित भएको छ । नेपाल प्रहरीले सोमबार बिहान ६ बजेसम्मको अवस्थाबारे सार्वजनिक गरेको विवरणअनुसार केही सडक पूर्ण रूपमा बन्द छन् भने केही खण्डमा एकतर्फी तथा समय तोकेर सवारी सञ्चालन भइरहेको छ ।

कोशी प्रदेशको सङ्खुवासभामा पहिरोका कारण कोशी राजमार्ग अवरुद्ध भएको छ । मकालु गाउँपालिका–४ स्थित नेता भिरमा असोज २ गते बिहान पहिरो गएपछि बन्द भएको सडकखण्ड अझै सञ्चालनमा आउन सकेको छैन ।