कुन जुनीमा समृद्ध होला देश ?

सुधार्न र गर्न बाँकी सानातिना काम धेरै छन् । तैपनि हाम्रो व्यस्तता र दिनचर्या आफ्नै पाराको जो छ, छँदै छ । घरअगाडि फोहोर थुप्रिएको छ । छिमेकीले सफा गर्ने नाममा प्लास्टिक डढाएर श्वासप्रश्वासमा बाधा पुर्‍याउँछ । खोलाछेउ हिँड्दा नाक थुन्नुपर्छ । अध्ययन, चिन्तन, मननमा मनै छैन ।

तास खेलेर रमाइलो गर्न फुर्सद छ । कहिलेकाहीँ खेल्दाखेल्दै जुरुक्क उठेर ‘हाम्रा नराम्रा बानी’ विषयक अन्तर्क्रियामा भाग लिन जाने काम पनि आइपर्छ । दिनहुँ भाषण, वाचन, भेला, छलफल र मिटिङ हुन्छन् । पार्टीका अनेक समितिका बैठक बस्छन् । तर त्यहाँ हुने भनेको खासगरी आफ्नो पार्टीको अति प्रशंसा र अन्य पार्टीको अति निन्दा नै हो ।