बाँदरको आतङ्कले विस्थापित हुँदै मकै र दाल खेती

काठमाडौं। सुनसरीको विष्णुपादुका र वराहक्षेत्र नगरपालिकाका किसानहरू बाँदरको उपद्रवका कारण परम्परागत खेती गर्न छाडेका छन्। विगत १५ वर्षदेखि बाँदरले बाली नष्ट गर्न थालेपछि स्थानीयहरू मकै, दाल र कोदो जस्ता बाली छोडेर बेसार, अम्रिसो र केरा जस्ता वैकल्पिक खेतीतर्फ आकर्षित भएका छन्।

वराहक्षेत्र-१, सूर्यकुण्डका अगुवा कृषक अर्जुन कुलुङका अनुसार बाँदरको समस्याले गर्दा धेरै किसानहरूले आफ्नो खेतीयोग्य जमिन बाँझै राख्न बाध्य भएका छन्। उनले १५ वर्षअघिसम्म डेढ बिघा जग्गामा मकै र कोदो खेती गर्दै आएका थिए, तर अहिले बाँदरको डरले १५ कट्ठा जग्गामा खेती गर्न छाडेका छन्। उनले भने, “बाँदरले मकै पाक्ने बेलासम्म कुर्न नदिने र बालीमा क्षति पुर्याउने गरेको छ।”