जलवायु कूटनीति: शाखा थप्ने कि शक्ति बढाउने?

जलवायु परिवर्तनका कारण नेपालका हिमाल, जलस्रोत, कृषि, पूर्वाधार र जनजीवनमा असर बढ्दै जाँदा परराष्ट्र मन्त्रालयले वातावरण कूटनीति शाखा स्थापनाको निर्णय गरेको छ। नेपालको दीर्घकालीन राष्ट्रिय हितसँग जोडिएको जलवायु कूटनीतिलाई अझ संस्थागत, समन्वित र परिणाममुखी रूपमा अघि बढाउन मन्त्रालयमा जलवायु कूटनीति शाखा स्थापना गरिएको मन्त्रालयले जनाएको छ।

संयुक्त राष्ट्रसंघ तथा विशिष्टीकृत संघसंस्था महाशाखाअन्तर्गत राखिएको उक्त शाखालाई एक उपसचिवले नेतृत्व गर्ने छन्। जलवायु तथा वातावरणसम्बन्धी अन्तर्राष्ट्रिय कूटनीतिक प्रयासलाई संस्थागत र प्रभावकारी बनाउने उद्देश्यले गरिएको यो निर्णयलाई सकारात्मक रूपमा लिन सकिन्छ तर यो शाखा स्थापनाको घोषणासँगै नेपालले समग्र जलवायु संकट सामना गर्न आफ्नो संस्थागत शक्ति कति बढाउँदै छ भन्ने प्रश्न झनै सान्दर्भिक र टड्कारो बनेको छ।