मुगुको एक गाउँ, जहाँ घरघरमा छ धारा

मुगु : मुलुककै राजधानी काठमाडौंमा समेत कतिपय ठाउँका घरमा धारा जडान हुन सकेका छैनन्। कतिपय स्थानमा धारा छन्, पानी आउँदैन। तर, मुगुस्थित छायाँनाथ रारा नगरपालिका— ९ मुर्मा गाउँमा भने एक घर एक धारा निर्माण भएको छ। यूएसएआईडी कर्णाली जल परियोजनाको आर्थिक सहयोग तथा हिमाली ग्रामीण युवा समाज विकास केन्द्रको प्राविधिक सहयोगमा छायाँनाथ रारा नगरपालिका—९ मुर्मा गाउँमा एक घर एक धारा निर्माण भएको हो।

मुर्मा गाउँमा ७१ घरधुरी छन्। प्रत्येक स्थानीयका प्रत्येक घरमा र तीन वटा सामुदायिक स्थानमा गरी ७४ धारा निर्माण गरिएका छन्। गाउँ नजिक पानीका मुहान छैनन्। मुर्मावासीले लामो समयदेखि पानीको समस्या झेल्दै आएका थिए। कर्णाली जल परियोजनाबाट ५१ लाख २१ हजार ६ सय ५४ रुपैयाँ ६ पैसा, छायाँनाथ रारा नगरपालिकाका तर्फबाट ३ लाख २७ हजार २२ रुपैयाँ ३९ पैसा र स्थानीयवासीको तर्फबाट १३ लाख ६२ हजार १ सय ६९ रुपैयाँ ११ पैसा गरी जम्मा ६८ लाख १ हजार ६ सय ५४ रुपैयाँ ६ पैसामा पाँच किलोमिटर ७ सय ५० मिटर टाढा चुचुमारे मुहानबाट पाइपलाइनमा पानी गाउँमा पुर्‍याई ७१ घर र ३ सामुदायिक संस्थामा धारा निर्माण भएको हिमाली ग्रामीण युवा समाज विकास केन्द्रका परियोजना व्यवस्थापक शिवचन्द्र कार्कीले जानकारी दिए।