एउटै घरभित्र तीन दशकको इतिहास

धनकुटा। धनकुटा नगरपालिका–६ सिरान बजारमा रहेको एउटा घर बाहिरबाट हेर्दा सामान्य घर जस्तै देखिन्छ। तर, घरभित्र पस्ने बित्तिकै त्यहाँको वातावरण फरक महसुस हुन्छ। कोठाका दराज, भित्ताका कुनाकाप्चा र र्‍याकमा सजाएर राखिएका पुराना सामग्रीले आगन्तुकलाई दशकौं पुरानो समयतिर पुर्‍याउँछन्।

घरभित्र कुनै समय नेपाली समाजको दैनिकीमा प्रयोग भएका रेडियो, ग्रामोफोन र टेलिफोन छन्। पुराना भाँडाकुँडा र कृषि औजार पनि छन्। राणा शासनकालको इतिहास सम्झाउने चन्द्र शमशेरकालीन इँटा र माटाका पाइप छन्। धनकुटाको पुरानो स्वरूप देखाउने दुर्लभ तस्बिर छन्। त्यति मात्र होइन, नेपालको प्रजातान्त्रिक आन्दोलनसँग जोडिएका महत्वपूर्ण दस्तावेज पनि त्यहीं सुरक्षित छन्।