शान्त माहोलमा फेरि भड्किए किम जोङ उन, ३ घण्टामै प्रहार गरे २ वटा मिसाइल !

उत्तर कोरियाले आइतबार आफ्नो पूर्वी तटबाट तीन घण्टाको अन्तरमा दुई छोटो दूरीका ब्यालिस्टिक मिसाइल प्रहार गरेको दक्षिण कोरियाको सेनाले जनाएको छ। दक्षिण कोरियाको संयुक्त सेना प्रमुख कार्यालयका अनुसार पहिलो मिसाइल उत्तर कोरियाको वोनसान क्षेत्रबाट प्रहार गरिएको थियो र त्यसले करिब ४५० किलोमिटर दूरी पार गरेको थियो। त्यसको करिब तीन घण्टापछि उत्तर कोरियाले अर्को मिसाइल पनि समुद्रतर्फ प्रक्षेपण गरेको हो।

दक्षिण कोरियाले मिसाइल प्रहारपछि निगरानी र सुरक्षा सतर्कता बढाएको छ। सियोलले अमेरिका र जापानसँग मिसाइलको उडानसम्बन्धी जानकारी आदानप्रदान गर्दै अवस्थाको विश्लेषण गरिरहेको जनाएको छ। यो उत्तर कोरियाले करिब एक साताभित्र गरेको दोस्रो ठूलो मिसाइल परीक्षण हो, जसले कोरियाली प्रायद्वीपमा फेरि सुरक्षा चिन्ता बढाएको छ।