रुसमा पुटिनको दलको अग्रता

५ असोज, मस्को (रासस/एएफपी)। साइबर आक्रमण र युक्रेनी ड्रोन हमलाबीच सम्पन्न रुसी संसदीय निर्वाचनमा राष्ट्रपति भ्लादिमिर पुटिनको सत्तारूढ युनाइटेड रसिया पार्टीले ठूलो अग्रता लिएको छ । सरकारी सञ्चारमाध्यमका अनुसार करिब ७१ प्रतिशत मतगणना हुँदा युनाइटेड रसियाले ५७ दशमलव पाँच प्रतिशत मत प्राप्त गरेको छ ।

राज्य डुमाका ४५० सिटका लागि भएको यो निर्वाचन सन् २०२२ मा युक्रेनमाथि रुसको ठूलो सैन्य कारबाही सुरु भएपछिको पहिलो संसदीय निर्वाचन हो । प्रारम्भिक परिणाममा कम्युनिस्ट पार्टीले १४ प्रतिशत र राष्ट्रवादी एलडिपिआरले आठ दशमलव सात प्रतिशत मत पाएका छन् । सरकारी समाचार संस्था तासका अनुसार सत्तारूढ दलले दुई तिहाइ बहुमत कायम राख्ने दिशामा रहेको छ ।