नेपालीको खुशीका स्रोत - मुटुमाथिको ढुंगा र सिरानीमुनिको मोबाइल

अवस्था हेर्दा दुई/चार जना बाहेक सबै नेपाली दुःखी हुनुपर्ने हो तर अनुहार हेर्दा दुई/चार जना बाहेक सबै खुशी देखिँदा रहेछन् । संसारभरको खुशी नाप्ने मिटरले पनि त्यही देखायो । दक्षिण एशियाभरका मान्छेलाई नजिकबाट नियाल्दा नेपालमा बस्नेहरू सबैभन्दा बढी खुशी देखिए ! नाप्ने मिटरको सुई बिग्रिएर यस्तो देखिएको पनि होइन रे । को धेरै खुशी छन् भनेर नाप्दा नेपाल संसारका १४३ देशमध्ये ९३औं र दक्षिण एशियामा चाहिँ पहिलो ।

नेपाली यति धेरै खुशी हुनुको राज के होला ? कारण थाहा पाउन अरूलाई नियाल्नै पर्दैन । पहिले आफैँलाई सम्झनुहोस् । जतिसुकै दुःख, पीर, चिन्ता, अभाव, निराशा, आक्रोश, असन्तुष्टि लगायत बेखुशी निम्त्याउने भएभरका कुरा एकैपटक थोपरिए पनि खुशी हुनका लागि एउटा सानो निहुँ नै काफी हुँदो रहेछ । बाटोमा हिँड्दाहिँड्दै पिसाबले च्याप्यो भने सडक छेउको रुखमा छेल पारेर उभिँदा क्षणभरमै आनन्द आउँछ । बसयात्रामा घण्टौं उभिएपछि बस्नका लागि बल्लबल्ल मुढा मिल्यो भने उतिखेरै राहत मिल्छ । अस्पतालमा बल्लबल्ल पर्खेर डाक्टर भेट्न पाउँदा आनन्द आउँछ । लाइनमा नबसी पेट्रोल भर्न पाउँदा के के भएजस्तो लाग्छ । निवेदन दिएको १५ दिनमै नागरिकता र पासपोर्ट हात पर्दा अनुहारमा चमक फिर्छ । मोबाइल नभेटेर चारतिर खोजिसकेपछि आफ्नै खल्तीमा फेला पर्दा मनमा शान्ति फर्किन्छ ।