बाढी प्रभावित क्षेत्रमा तत्काल बेलीब्रिज र दीर्घकालीन सडक मर्मतलाई तिब्रताः सडक विभाग

काठमाडौँ ।

भोटकोशी बाढीका कारण क्षतिग्रस्त बनेका सडक र पुलहरूको पुनर्निर्माणलाई तिब्रता दिँदै सडक विभागले प्रभावित क्षेत्रमा तत्काल बेलीब्रिज जडान गर्ने प्रक्रिया शुरु गरेको जनाएको छ । सिंहदरबारमा सोमवार बसेको पूर्वाधार विकास समितिको बैठकमा सडक विभागका महानिर्देशक डा. विजय जैसीले गल्छी–बेनीघाट र विदुर खण्डका क्षतिग्रस्त संरचनाहरूको वस्तुस्थिति र भइरहेका प्रयासबारे जानकारी गराउनुभएको हो । डा. जैसीकाअनुसार गल्छी–बेनीघाट खण्डमा जम्मा भएको दुईदेखि चार मिटरसम्मको गेग्रान र पहिरो हटाएर यातायात सञ्चालनमा ल्याइसकिएको छ । त्रिशूली नदीको बहावले क्षति पु¥याएको कोलमु खोला पुलमा अस्थायी विकल्प अपनाई सवारी साधन सञ्चालन गरिएको र स्थायी समाधानका लागि ठेक्का प्रक्रियामार्फत काम शुरु भइसकेको बताउनु भयो । सो पुल १५ दिनभित्र निर्माण सम्पन्न गर्ने लक्ष्य राखिएको जानकारी दिनुभयो ।