रोल्पा शहरी खानेपानी उपभोक्ता तथा सरसफाइ समितिको सातौं साधारणसभा सम्पन्न

रोल्पा- रोल्पा शहरी खानेपानी उपभोक्ता तथा सरसफाइ समितिको सातौं साधारणसभा सम्पन्न भएको छ। साधारणसभामा खानेपानी आयोजनाको डिजाइनमा कमजोरी हुँदा लिफ्टिङ प्रणालीमार्फत पानी आपूर्ति गर्नुपरेको र त्यसका कारण सञ्चालन खर्च बढेर उपभोक्तामाथि आर्थिक भार थपिएको विषय उठाइएको छ।

राष्ट्रिय साना शहरी खानेपानी उपभोक्ता महासंघका अध्यक्ष खेमराज ओलीले आयोजनाको डिजाइनमा कमजोरी रहेको भन्दै प्राकृतिक रूपमा उपलब्ध पानीका मुहानबाट पानी ल्याउन सकिने अवस्था हुँदाहुँदै लिफ्टिङ प्रणाली अपनाइएको बताए। लिफ्टिङ प्रणालीका कारण विद्युत् महसुल, कर, मूल्य अभिवृद्धि कर, ब्याज तथा अन्य सञ्चालन खर्च बढ्दा उपभोक्ताले महँगो खानेपानी महसुल तिर्नुपरेको उनको भनाइ थियो।