थाहा पाउँदा पाउँदै पनि स्क्यामरको जालोमा परे इन्जिनियर, अनलाइन लगानीको नाममा १० लाख स्वाहा !

काठमाडौँ । राजधानीका एक २८ वर्षीय इन्जिनियर राम्रै कम्पनीमा काम गर्थे । उनको जीवनमा सबै ठीकठाक चलिरहेको थियो । गत डिसेम्बरतिर उनको ह्वाट्सएपमा एउटा मेसेज आयो, जसमा अनलाइन लगानी गरेर लाखौँ कमाउन सकिने दाबी गरिएको थियो ।

त्यही मेसेजको पछि लाग्दा उनी यस्तो चङ्गुलमा फसे, जहाँबाट निस्किन निकै सकस भइरहेको छ । सुरुमा १,५०० रुपैयाँ निःशुल्क पाएका उनले अन्जानमै १० लाख रुपैयाँभन्दा बढी गुमाए । अहिले सुरुमा पाएको त्यही केही हजार रुपैयाँले गर्दा उनी आफैँ स्क्यामर जस्तो देखिन पुगेका छन् ।