नेतृत्वको प्रश्न उठेपछि केन्द्रीय कमिटीमा ओली झन् आक्रामक

नेकपा एमालेभित्र अध्यक्ष केपी शर्मा ओलीको नेतृत्वलाई लिएर बहस चर्किरहेका बेला सोमबारदेखि सुरु भएको केन्द्रीय कमिटी बैठकमा ओलीको प्रस्तुति पनि आक्रामक देखिएको छ । पार्टी पुनर्गठन र नेतृत्व परिवर्तनको आवाज उठिरहेका बेला ओलीले त्यस्ता गतिविधिप्रति तीव्र असन्तुष्टि जनाउँदै पार्टीभित्रैबाट नेतृत्वविरुद्ध बोल्नेहरूलाई कडा चेतावनी दिएका छन् ।

ललितपुरको भनिमण्डलस्थित पार्टी प्यालेसमा सुरु केन्द्रीय कमिटी बैठकलाई सम्बोधन गर्दै ओलीले आफूलाई हटाउन माग गर्दै उठेको आवाजप्रति असन्तुष्टि जनाएका हुन् । उनले पार्टीमाथि ‘फासीवादी हमला’ भइरहेको दाबी गर्दै यस्तो अवस्थामा पार्टीभित्रै केही व्यक्ति र तत्व समस्या सिर्जना गर्न सक्रिय भएको आरोप लगाए ।