टोपबहादुर रायमाझीले फोन गरेपछि काठमाडौं आएका थिए टेकनाथ रिजाल  

नक्कली भुटानी शरणार्थी प्रकरणमा पक्राउ परेका भुटानी शरणार्थी नेता टेकनाथ रिजालले टोपबहादुर रायमाझीले फोन गरेर बोलाएपछि काठमाडौं आएको बयान दिएका छन् । उनले यस्तो बयान जिल्ला अदालत काठमाडौंमा दिएका हुन् । शुक्रबार नक्कली भुटानी प्रकरणका पक्राउ परेको १८ जना अभियुक्तको बयान सकिएको छ ।

बयानका क्रममा रिजाललाई न्यायाधीशले प्रश्न गरेका छन्, ‘तपाईंलाई सहप्रतिवादी बिक्रम भन्ने गोविन्दकुमार चौधरीले अनुसन्धानको क्रममा खुला लेखाई दिएको बयान व्यहोरामा तपाईंलाई टोपबहादुर रायमाझीले फोन गरी काठमाडौं आउनु भनी बोलाएक र प्रतिवादी बिक्रम भन्ने गोविन्द कुमार चौधरीले तपाईं एयरपोर्ट आइसकेपछि टोपबहादुर रायमाझीको घरमा गएको भन्ने कुरा कसो हो ?’