जनआन्दोलनका घाइतेको पीडा : राज्यले त ठग्यो ठग्यो सहकारीले पनि ठग्यो

पोखरा । पोखरा महानगरपालिकामा अस्ति बुधबार केही हुल आएर हो हल्ला गरे । रिस्सिँदै आएका उनीहरू महानगरमा आफ्नो समयस्या राखेको पनि महिनौं बितिसकेको रहेछ । लामो समयसम्म पनि केही न्याय नपाएपछि पुनः महानगर घेराउ गर्ने हेतुले महानगर आए । उनीहरूलाई साम्य पार्दै पोखरा महानगरपालिकाका मेयर धनराज आचार्यले बैठक कक्षमा लगेर गुनासो सुन्नुभयो । त्यो भीड थियो पोखरा महानगरपालिका–४ नालामुख मार्ग सूर्यदर्शन बचत तथा ऋण सहकारी संस्थामा बचत गर्न आउनेहरूको ।

विगत ६ महिनादेखि उनीहरूले सहकारीबाट रकम निकाल्नै पाएका रहेनछन् । सोही भीडमा थिए वैशाखी टेकेका नेत्रपाणि सुवेदी । उहाँको ढाड भाँचिएको हो । २०६२÷०६३ सालमा भएको जनआन्दोलनको बेलामा प्रहरीको कुटाइबाट घाइते भएका सुवेदी अहिले वैशाखीको सहायताले हिँड्न बाध्य हुनुहुन्छ । कास्कीकोट घर भई हाल पोखरा–६ बस्दै आएका उहाँले औषधि खाने १२ लाख रुपियाँ सूर्यदर्शन सहकारीमा लगानी गर्नुभयो । तर, ६ महिनादेखि उहाँले रकम निकाल्न पाउनुभएको छैन । ‘सूर्यदर्शन भन्ने सहकारीमा हामीले लगानी गरेका हौं । यो सहकारीले अर्ब होइन खर्ब पैसा खाएको छ । यसमा लगानी र बचत गर्ने बचतकर्ता धेरै छन् । सबैको पैसा खाएको छ’, उहाँले भन्नुभयो– ‘म जनआन्दोलनमा घाइते भएको व्यक्ति हुँ मैले औषधि खान जम्मा गरेको १२ लाख रुपियाँ यिनीहरूले खाइदिए । मलाई सरकारले हेर्दैन । नेता सबै सामन्त हुन् ।’