कोइरालाकै अडानमा बन्यो संविधान

बहुआयामिक, सादगी जीवनशैली र निष्ठावान् राजनीतिज्ञ सुशील कोइरालाले २०७२ असोज ३ गते संविधान घोषणा गर्दा साझा राष्ट्रिय दृष्टिकोण निर्माण गर्नुभयो । ‘हलिउडको नायक बन्ने’ बाल्यकालको सपना पूरा नभए पनि पूर्वप्रधानमन्त्री एवं नेपाली कांग्रेसका पूर्वसभापति कोइरालाले नेपालको संविधान घोषणाका लागि नायकत्व प्रदान गर्नुभयो ।

सात दशकसम्म नेपाली जनताको बलिदानी पूर्ण सङ्घर्षपछि संविधान सभा २०६४ बाट संविधान निर्माण हुन नसकेपछि संविधान सभा २०७० को निर्वाचनबाट प्राप्त नयाँ जनादेशका आधारमा संविधान सभाले झन्डै दुई वर्षपछि तत्कालीन प्रधानमन्त्री कोइरालाकै अटल, दृढ र साहसिक अठोटकै प्रतिफल ‘नेपालको संविधान २०७२’ जारी भएको हो ।