नेपाल–भारतबीच सूचना संयन्त्र बनाउने सहमति

सीमा क्षेत्रमा हुने अपराध नियन्त्रणका लागि नेपाल र भारतबीच सूचना संयन्त्र बनाउने सहमति भएको छ । सीमा सुरक्षामा खटिएका नेपालको सशस्त्र प्रहरी बल र भारतको सशस्त्र सीमा बलबीच काठमाडौंमा जारी सीमा समन्वय बैठकमा यस्तो सहमति भएको हो ।

बैठकमा सहभागी एक अधिकारीका अनुसार नेपालमा बाहिनीमा तथा भारतमा सेक्टरमा एक–एकजना सम्पर्क व्यक्ति तोकेर सूचना आदानप्रदान गर्ने विषयमा सहमति भएको हो । यद्यपि, यस विषयमा दुवै देशका सरकारबाट निर्णय हुनुपर्छ । ‘आपराधिक सूचनाको आदानप्रदान अहिले पनि हुँदै आएको छ,’ बैठकमा सहभागी एक अधिकारीले भने, ‘अब भने स्थायी संयन्त्र नै बनाएर सीमा अपराधलाई निन्यन्त्रण गर्ने सहमति बनेको हो ।’