विदेशी विनिमय सञ्चिति : पाँच वर्षमा तीन गुणा बढ्यो

पछिल्ला पाँच वर्षमा नेपालको विदेशी विनिमय सञ्चिति करिब तीन गुणाले बढेको छ। युवा वैदेशिक रोजगारीमा गएपछि रेमिटेन्स आप्रवाहमा भएको वृद्धि, पर्यटकबाट हुने विदेशी मुद्रा आम्दानी, वैदेशिक सहायता तथा ऋण, निर्यातबाट प्राप्त विदेशी मुद्रा, आयातमा भएको तुलनात्मक नियन्त्रणलगायत कारणले सञ्चिति बढेको हो।

नेपाल राष्ट्र बैंकका अनुसार विदेशी विनिमय सञ्चिति २०८३ साउन मसान्तमा ३९ खर्ब ४६ अर्ब २३ करोड रुपैयाँ पुगेको छ। आर्थिक वर्ष (आव) २०७८/७९ को असार मसान्तमा विदेशी विनिमय सञ्चिति १२ खर्ब १५ अर्ब ८० करोड रुपैयाँ थियो। पछिल्लो अवधिमा सञ्चितिमा भएको निरन्तर वृद्धिले नेपालको बाह्य क्षेत्रको वित्तीय क्षमता विस्तार भएको छ।