क्रिप्टाे अपराध र प्रविधिबीचको फरक नछुट्याउँदा नेपालले गुमाउँदैछ अवसर

गत हप्ता विश्वका ठूला क्रिप्टोकरेन्सी विनिमय कम्पनीमध्ये एकका प्रमुख कार्यकारी अधिकृतसँग मेरो लामो छलफल भयो । उहाँले नेपालमा आफ्नो कम्पनीको क्षेत्रीय सहायक कार्यालय स्थापना गर्ने प्रस्ताव राख्नुभयो । प्रारम्भिक योजनाअनुसार सूचना प्रविधि विकास, साइबर सुरक्षा, ग्राहक सेवा, KYC प्रमाणीकरण, कारोबार अनुगमन, ठगी पहिचान, अनुपालना र सञ्चालनमा करिब एक हजार नेपालीलाई रोजगारी दिन सकिने प्रस्ताव थियो । यो नेपालमा Crypto विनिमय केन्द्र खोलेर सर्वसाधारणबाट पैसा उठाउने योजना थिएन । नेपाली बैङ्कको रकम प्रयोग गरेर क्रिप्टोकरेन्सी बेच्ने प्रस्ताव पनि थिएन ।

नेपालमा रहेका दक्ष जनशक्तिले विदेशमा इजाजतप्राप्त तथा नियमनभित्र सञ्चालित कम्पनीलाई प्रविधि र सहायक कार्यालय सेवा उपलब्ध गराउने अवधारणा थियो । कम्पनी नेपालमा दर्ता हुन्थ्यो । कर्मचारीले वैधानिक बैंकिङ माध्यमबाट तलब पाउँथे । विदेशी मुद्रा नेपाल भित्रिन्थ्यो र कम्पनी तथा कर्मचारीले सरकारलाई कर तिर्थे ।