बैकमा पैसा थुप्रियो लगानी भने बढेन

नेपालको अर्थतन्त्र अहिले पैसाको अभाव नभई पैसा चल्ने वातावरणको अभाव रहेको छ । विदेशी मुद्रा सञ्चिति १८ दशमलव ८ महिनाको वस्तु तथा आयात धान्न पर्याप्त छ । रेमिट्यान्स बढिरहेको छ । बैंकिङ प्रणालीमा पर्याप्त तरलता छ । ब्याजदर दशककै न्यून अवस्थामा छ । तर निजी क्षेत्रको लगानी बढेको छैन । तीन वर्षयता निजी क्षेत्रतर्फ कर्जा विस्तार औसत ६ प्रतिशत हाराहारीमा सीमित छ, जबकि राष्ट्र बैंकको लक्ष्य करिब १२ प्रतिशत थियो । अर्थतन्त्रमा पैसा छ तर पैसा लगानीमा गएको छैन ।

बैंकमा पैसा थुप्रिँदा पनि उद्योगमा लगानी नहुनु नेपालको अर्थतन्त्रले भोगिरहेको सबैभन्दा ठूलो विरोधाभास हो । कोभिडपछि रोकिएको माग खुलेसँगै आर्थिक वर्ष २०७८।०७९ मा करिब ६ प्रतिशत आर्थिक वृद्धि भए पनि बढ्दो आयातले विदेशी मुद्रा सञ्चितिमा दबाब सिर्जना गरेको छ । सरकारले माग र आयात नियन्त्रणका उपाय अपनाएपछि अहिले बाह्य क्षेत्र सहज भएको छ । तर वित्तीय प्रणालीमा पैसा थुप्रिए पनि उद्योग व्यवसायमा लगानीको गति बढेको छैन । यसले समस्या पैसाको उपलब्धताभन्दा लगानीकर्ताको विश्वास र आर्थिक वातावरणमा रहेको देखाउँछ ।