रुसको संसदीय निर्वाचनमा पुटिनको पार्टीलाई दुईतिहाइ बहुमत

काठमाडौं । रुसको संसदीय निर्वाचनमा राष्ट्रपति भ्लादिमिर पुटिनको ‘युनाइटेड रसिया’ पार्टीले दुईतिहाइभन्दा बढी बहुमत हासिल गरेको छ । लगभग पूर्ण आधिकारिक नतिजाअनुसार कडा नियन्त्रण र सीमित विपक्षी सहभागिताबीच सम्पन्न निर्वाचनमा युनाइटेड रसियाले ५७.८३ प्रतिशत मत पाएको छ । पार्टीले ४५० सदस्यीय तल्लो सदन ‘स्टेट डुमा’मा ३५५ सिट जितेको अलजजिराले जनाएको छ ।

आइतबार सकिएको तीनदिने मतदानपछि सोमबार सार्वजनिक गरिएको नतिजाअनुसार, युनाइटेड रसियाले सन् २०२१ को निर्वाचनमा पाएको ४९.८ प्रतिशत मतभन्दा उल्लेख्य रूपमा बढी मत प्राप्त गरेको हो । सन् २००१ मा गठन भएदेखि रुसी राजनीतिमा वर्चस्व कायम गर्दै आएको यो पार्टीले स्टेट डुमामा संवैधानिक बहुमत कायम गरेको छ ।