बाढीपछि एक्सनमा सरकार: चार तुइन सञ्चालनमा, ३३ झोलुङ्गे पुल पुनर्निर्माणको तयारी

काठमाडौँ । रसुवामा आएको बाढीका कारण क्षतिग्रस्त तुइन तथा झोलुङ्गे पुलको मर्मत र पुनर्निर्माणलाई सरकारले तीव्रता दिएको छ। पूर्वाधार विकास मन्त्रालयका अनुसार हालसम्म चार स्थानमा तुइन निर्माण गरी सञ्चालनमा ल्याइसकिएको छ भने थप तीन स्थानमा तुइन जडानको प्रक्रिया अघि बढाइएको छ।

मन्त्रालयका अनुसार इन्द्रेणीचौर र गुम्बाडाँडालाई जोड्ने त्रिशूली नदीमा मोटराइज्ड तुइन निर्माण गरी सञ्चालनमा ल्याइएको छ। यसैगरी नुवाकोटको विदुर नगरपालिका–५ देविघाट, रसुवाको गोसाइँकुण्ड गाउँपालिका–५ र ६ अन्तर्गत स्याफ्रुबेँसी–चिलिमे जलविद्युत् आयोजना क्षेत्र तथा गोसाइँकुण्ड गाउँपालिका–६ र आमाछोदिङ्मो गाउँपालिका–१ को हाकुबेंसीमा पनि तुइन सञ्चालनमा आइसकेका छन्।