ग्रीनल्यान्डमा नयाँ सैन्य बेस स्थापना गर्ने अमेरिकाको तयारी

ग्रीनल्यान्ड । अमेरिकाले दक्षिणी ग्रीनल्यान्डमा शीतयुद्धको समयको सैन्य अड्डा पुनःस्थापना गर्ने र ग्रीनल्यान्डको पूर्वी तटमा अर्को सैन्य अड्डा स्थापना गर्ने योजना बनाएको छ । उक्त पूर्वी तटीय स्थान अहिले डेनमार्कको डग स्लेड (कुकुरले तान्ने स्लेज) गस्ती टोलीले प्रयोग गर्दै आएको छ । मंगलबार डेनमार्क र ग्रीनल्यान्डसँग हुने सम्झौताअन्तर्गत यी योजना अघि बढाइने सम्बद्ध स्रोतलाई उद्धृत गर्दै रोयटर्स समाचार एजेन्सीले जनाएको छ ।

जस अनुसार, दक्षिणी ग्रीनल्यान्डको नार्सार्स्वाकमा अमेरिकी सैन्य अड्डा पुनःस्थापना गरिनेछ । त्यहाँ सन् १९५० को दशकमा अमेरिकाले आफ्नो ब्लुई वेस्ट वन सैन्य अड्डा बन्द गरेपछि अहिले केही दर्जन मानिस मात्र बसोबास गर्छन् । अर्को सैन्य स्थान मेस्टर्सीभगमा स्थापना गरिनेछ, जुन अहिले डेनमार्कको विशेष सैन्य बलअन्तर्गत रहेको सिरियस डग स्लेड पेट्रोलले प्रयोग गर्दै आएको छ ।