भदौमा भएका सवारी दुर्घटनामा १२ को मृत्यु

जिल्लामा रहेका त्रिभुवन राजपथ, पूर्व-पश्चिम महेन्द्र राजमार्ग, हुलाकी राजमार्ग र ग्रामीण सडकहरूमा सवारी दुर्घटना भयावह बन्दै गएको छ। पथलैया-हेटौंडा त्रिभुवन राजपथ, पथलैयादेखि पूर्व जाने पूर्व-पश्चिम महेन्द्र राजमार्ग, वीरगन्ज-पथलैया व्यापारिक मार्ग र वीरगन्ज-कलैया-बरियारपुर हुलाकी सडकमा सवारी दुर्घटना भयावह भएको हो।

सवारी दुर्घटनामा परी ठुलो संख्यामा मानिसले ज्यान गुमाउने, घाइते भएर अंगभंग हुनुका साथै सवारी साधन पनि क्षतिग्रस्त हुँदै आएका छन्। राजमार्गहरूमा चल्ने सवारी साधन जाँच गर्न जताततै ट्राफिक प्रहरी, नेपाल प्रहरी र सशस्त्र प्रहरी देखिए पनि सवारी दुर्घटनामा कुनै कमी आएको देखिँदैन। भदौ महिनामा मात्रै बारामा सवारी दुर्घटनामा परी १२ जनाले ज्यान गुमाएको जिल्ला प्रहरी कार्यालय बाराले जनाएको छ। साथीले चलाएको मोटरसाइकल दुर्घटनामा परी घाइते भएका जितपुरसिमरा उपमहानगरपालिकाको रमौलीनिवासी राजु सहनीको उपचारका क्रममा मृत्यु भएको इलाका प्रहरी कार्यालय सिमराले जनाएको छ।