'ग्लिपिड–१' गुणस्तरहीन नभएको टाइम फर्मास्युटिकल्सको दाबी

काठमाडौं- टाइम फर्मास्युटिकल्स लिमिटेडले आफूद्वारा उत्पादित मधुमेहको औषधि ‘ग्लिपिड–१’ (GLIPID-1, ब्याच नं. GM-070) गुणस्तरहीन नरहेको प्रष्टीकरण दिएको छ। औषधि व्यवस्था विभागले ब्याच नं. GM-070 को उक्त औषधि फिर्ता (Recall) गर्न निर्देशन दिएपछि सामाजिक सञ्जाल तथा मिडियाहरूमा भ्रामक सामग्री प्रसार भएको भन्दै कम्पनीले गम्भीर ध्यानाकर्षण भएको जनाएको छ।

कम्पनीका प्रबन्ध सञ्चालक सुदर्शन लाल श्रेष्ठद्वारा जारी विज्ञप्ति तथा विभागमा पठाइएको पत्र अनुसार, राष्ट्रिय औषधि प्रयोगशाला र उद्योगको परीक्षण विधि (Method) फरक परेका कारण यो अवस्था सिर्जना भएको हो। United States Pharmacopeia (USP) को गाइडलाइनमा ‘Test 1’ वा ‘Test 2’ जुनसुकै विधिबाट पनि परीक्षण गर्न सकिने उल्लेख छ। राष्ट्रिय औषधि प्रयोगशालाले ‘USP Dissolution Test-I Method’ बाट परीक्षण गरेको र कम्पनीले आफ्नै क्वालिटी कन्ट्रोल शाखाको 'कन्ट्रोल सेम्पल' लाई ‘USP Dissolution Test-II Method’ बाट परीक्षण गर्दा ४५ मिनेटमा ९३ प्रतिशत ‘ड्रग रिलिज’ भई औषधि पास भएको कम्पनीको भनाइ छ।