कांग्रेसप्रति किन आशा जागेन ?

काठमाडौं : कांग्रेसका युवा नेताहरू पार्टीप्रति युवा पंक्ति आकर्षण नभएकोमा चिन्ता व्यक्त गर्छन्। पार्टीले सही नीति र नेतृत्व लिनसके मात्रै युवामा आकर्षण देखिने उनिहरूको तर्क छ।

‘राजनीतिप्रति नै युवाको आकर्षण होइन, असन्तुष्टि बढ्दो छ,’ युवा नेता भुपेन्द्रजंग शाही भन्छन्, ‘कांग्रेसले रूखमा मत हाल्न दिन्न। अरूमा भोट हाल्न लगाएपछि ती युवा कसरी कांग्रेसमा रहन्छन् ? एकपटक अरू चिन्हमा भोट हालिसकेपछि कांग्रेसप्रतिको मोह नै भंग हुन जान्छ।’ युवा नेता गुरु घिमिरे पनि पार्टीले गम्भीर रूपमा समीक्षा गर्नुपर्ने बेला आएको बताउँछन्। सरकारको कार्यसम्पादन मूल्यांकन, पार्टीको १४औं महाधिवेशनदेखि हालसम्मको समयको विश्लेषण गर्नुपर्ने उनको भनाइ छ।