विपद् र महँगीले योजना कार्यान्वयनमा चुनौती

पाँचथरमा आर्थिक वर्ष २०८२/०८३ मा सञ्चालन गरिएका विकास योजना तथा कार्यक्रमको कार्यान्वयनमा विपद् र बढ्दो महँगी मुख्य चुनौती बनेको कार्यालय प्रमुख तथा प्रतिनिधिहरूले बताएका छन् ।

फिदिममा आयोजित वर्षभरि भएका कामको प्रगति समीक्षा तथा असल अभ्यास आदानप्रदान गर्न आयोजित दुईदिने वार्षिक समीक्षा कार्यक्रममा यस्तो अनुभव प्रस्तुत गरिएको हो । जिल्ला समन्वय समिति पाँचथरको आयोजनामा भएको कार्यक्रममा जिल्लाका स्थानीय तह तथा प्रदेश र सङ्घ सरकार मातहतका कार्यालयले गत आर्थिक वर्षमा सम्पन्न गरेका योजना तथा कार्यक्रमको प्रगति, वित्तीय खर्च र कार्यान्वयनका क्रममा देखिएका समस्या प्रस्तुत गरेका थिए ।