कोशी प्रदेश: राष्ट्रियसभाको निर्वाचनको सम्पूर्ण तयारी पूरा

मोरङ । कोशी प्रदेशमा राष्ट्रियसभाका दुई सदस्यको निर्वाचनका लागि सम्पूर्ण तयारी पूरा भएको छ । कोशी प्रदेशमा राष्ट्रियसभाका लागि दलित र महिला सदस्य पदका लागि चार जना उम्मेदवार प्रतिस्पर्धामा छन् । राष्ट्रियसभा सदस्यको मतदान प्रदेश निर्वाचन कार्यालय विराटनगरमा आइतबार बिहान १०ः०० देखि ३ः०० बजेसम्म हुने कार्यालयका सूचना अधिकारी तीर्थराज अधिकारीले जानकारी दिए ।

प्रदेशमा खुल्ला तर्फको एक सदस्य पदमा निर्विरोध निर्वाचित भइसकेका छन् । नेपाली कांग्रेस–नेकपा कम्युनिस्ट पार्टी (एमाले) गठबन्धनबाट खुल्ला तर्फका कांग्रेसका सुनिलबहादुर थापा निर्विरोध निर्वाचित भएका हुन् । यसैगरी गठबन्धनबाट महिलामा रोशनी मेचे र दलितमा सोम पोर्तेल उम्मेदवार छन् भने नेकपाबाट महिलामा नमिता न्यौपाने र दलितमा खेम सुन्दासले उम्मेदवारी दिएका छन् । राष्ट्रियसभा सदस्य निर्वाचनका लागि प्रदेशको मतभार १० हजार १३५ रहेको छ । निर्वाचनका मतदाता प्रदेशसभा सदस्य र स्थानीय तहका प्रमुख र उपप्रमुख हुन्छन् ।