अझै राजनीतिक छोइछिटो

मान्छेमान्छेबीच छोइछिटो गर्ने कुरीति समाजमा अझै कतैकतै बाँकी छ। जसको उन्मूलन नगरी समाज उँभो लाग्दैन। त्यसका लागि सामाजिक र सांस्कृतिक जागरण चाहिन्छ। त्यो काम राजनीतिले अझै छिटो गर्न सक्छ। तर हाम्रो राजनीतिमा अझै पनि दलित समुदायमाथि उस्तै उपेक्षा र राजनीतिक छोइछिटो बाँकी छ। त्यसैको परिणाम हो, देशका ७ प्रदेशमध्ये ५ वटाका मन्त्रिपरिषद्मा दलितको शून्य प्रतिनिधित्व।

नेपाली समाज थरीथरी भाषाभाषी, जातजाति, भूगोल र सांस्कृतिक विविधताको इन्द्रेणी छ, राज्यमा त्यसको प्रतिबिम्ब भने अपुरो र अधुरो छ। ७ प्रदेशमा ६२ जना मन्त्री छन्। गण्डकीमा एकजना दलित महिला सीता सुन्दासले अर्थ मन्त्रालयको बागडोर सम्हाल्न पाउँदा कर्णालीमा उर्मिला विश्वकर्मा भौतिक पूर्वाधार राज्यमन्त्री छन्।