सेनाको साख

लोकतान्त्रिक शासन व्यवस्थाको सुदृढीकरणमा संस्थाहरूको निर्माण अपरिहार्य हुन्छ। सुदृढ संस्थाहरूले मात्र लोकतन्त्र जोगाउन सक्छन्। संस्था निर्माण भएन भने व्यक्ति विशेषले आफूअनुकूल परिस्थिति लैजान कोसिस हुन्छ। गत भदौको जेनजी आन्दोलन र त्यसको आडमा मुलुकमाथि गरिएको आगजनी, लुटपाट र ध्वसंसँगै संस्थाहरूको भूमिकाबारे बहस सुरु भएको छ। देशले उच्च स्थानमा राखेका र नागरिकको आस्थाको केन्द्रमा रहेका कैयन् संस्थाहरूले आफ्नो मर्यादाअनुरूप काम गर्न सकेको वा नसकेको भन्नेमा पनि प्रश्न भइरहेका छन्।

पहिलो, गत भदौ २३ को जेनजी आन्दोलन, त्यसलाई दुरुपयोग गर्दै संसद् भवनमा भएको आक्रमण र त्यसविरुद्धको सुरक्षा कारबाहीमा युवाहरूको सहादतको पृष्ठभूमि छ। दुई, २३ गतेका घटनाक्रमलाई दुरुपयोग गर्दै २४ गते राज्यका प्रमुख अंग, व्यावसायिक प्रतिष्ठान र व्यक्तिका सम्पत्तिमाथि आगजनी, तोडफोड र लुटपाट भएका छन्। यी घटनाक्रमका सन्दर्भमा हाम्रा राष्ट्रिय सुरक्षा संस्था र तिनका प्राथमिकताबारे छलफल र बहस हुनु स्वाभाविक हो। शान्तिपूर्ण भनिएको जेनजी आन्दोलनलाई संसद्माथि आक्रमणतर्फ किन र कसरी मोडियो ? त्यसको जवाफ अझै आएको छैन। जेनजी अभियानकर्ताहरूले आफ्नो आन्दोलन सकियो भन्दाभन्दै संसद्मा आक्रमण गर्न उत्प्रेरित गर्नेहरू को को थिए ?