हिउँसँगै मुस्कुरायो जुम्ला, फर्कियो भरोसा

शनिबार बिहान जुम्लाका डाँडाकाँडा सेताम्मे बनेपछि धेरै किसानको अनुहारमा लामो समयपछि मुस्कान फर्किएको छ। वर्षौंदेखि खडेरी, असिना र अनियमित मौसमसँग जुध्दै आएका किसानका लागि यो हिमपात चिसोको आगमन मात्र नभई आशाको संकेत बनेको छ।

पछिल्ला केही वर्षयता जुम्लाका लेकाली भूभागमा छिटपुट हिमपात भए पनि तल्लो भेगमा हिउँको सट्टा वर्षा हुँदै आएको थियो। त्यसले हिउँदेबालीको चक्र नै बिगार्दै आएको किसानको भनाइ छ। तर यसपटक जिल्लाभर एकसाथ परेको हिमपातले जमिन ढाकेको छ। सदरमुकाम क्षेत्रमा करिब आधा फिट र लेकाली क्षेत्रमा एक फिटसम्म हिउँ जमेको छ।