स्ववियु निर्वाचन प्रक्रिया शुरू- आज संघ संगठन दर्ता, आइतबार मतदाता सूची सार्वजनिक

काठमाडौं । चैत ५ गते हुने स्वतन्त्र विद्यार्थी युनियन (स्ववियु) निर्वाचन प्रक्रिया आज शुक्रबारबाट शुरू भएको छ । आज निर्वाचनमा भाग लिने विद्यार्थी संघ संगठनको दर्ता शुरू गर्ने कार्यतालिका छ ।

स्ववियु निर्वाचन केन्द्रीय अनुगमन तथा समन्वय समितिका सदस्य सचिव एवं त्रिवि विद्यार्थी कल्याण तथा खेलकुद निर्देशनालयका निर्देशक प्रा.पशुपति अधिकारीले नेपाल समाचारपत्रसँग कुरा गर्दै आज त्रिविको सम्बन्धन प्राप्त ६२ क्याम्पससहित स्ववियु निर्वाचन गराउने सामुदायिक क्याम्पसमा संघ–संगठन दर्ता गरी निर्वाचन प्रक्रिया शुरू हुने बताउनुभयो । उहाँले भन्नुभयो– ‘योसँगै अब सबै क्याम्पसमा स्ववियुको माहोल तयार भएको छ । अब त्रिवि निर्वाचनमा होमियो, सबै क्याम्पसको निर्वाचन समितिले आ–आफ्नो काम शुरू गर्नेछन् ।’