नुवाकोटका नेताहरुको आग्रह- 'संविधान र लोकतन्त्र रक्षाका लागि मत दिनुहोस्' 

नुवाकोट — जिल्लाका वाम-लोकतान्त्रिक गठबन्धन दलका उम्मेदवार र नेताहरुले संविधान र लोकतन्त्र रक्षाका लागि मत दिन आग्रह गरेका छन् । काठमाडौंमा शनिबार गठबन्धन दल नुवाकोट काठमाडौं सम्पर्क समितिले आयोजना गरेको शुभकामना आदानप्रदान कार्यक्रममा नेताहरुले आउँदो मंसिर ४ को प्रतिनिधि र प्रदेशसभा निर्वाचनमा गठबन्धनका उम्मेदवार जिताउन आग्रह गरेका हुन् ।

माओवादी केन्द्रका नेता एवं निर्वाचन क्षेत्र नं. १ प्रतिनिधिसभा सदस्यका उम्मेदवार हितबहादुर तामाङले पश्चागामी गठबन्धनले पुनर्स्थापित संसद्, संविधान, लोकतन्त्र, समावेशी, गणतन्त्रविरुद्धमा धावा बोलेको बताए । उनले भने,‘प्रतिगामी गठबन्धनलाई पराजय गर्न यो गठबन्धन कायम गरेर अगाडि बढेका छौं ।’