‘स्ववियु नहुँदा विद्यार्थीले आफूलाई स्वघोषित नेता भनेर विश्वविद्यालयमा बाधा सिर्जना गरिरहेका छन्’

स्वतन्त्र विद्यार्थी युनियन (स्ववियु) विद्यार्थीको मतद्वारा चुनिने वैधानिक संस्था (निकाय) मानिन्छ, जसले विद्यार्थीलाई विश्वविद्यालयको नीति, पाठ्यक्रम र शैक्षिक कार्यक्रमसँग जोड्छ। समय र परिस्थितिअनुसार विश्वविद्यालयको पाठ्यक्रम र शैक्षिक कार्यक्रममा गर्नुपर्ने आवश्यक परिमार्जन र परिस्कृत शैक्षिक वातावरण निर्माणका लागि स्ववियुको भूमिकालाई महत्त्वपूर्ण मानिन्छ। विश्वका धेरै प्रतिष्ठित विश्वविद्यालयमा पनि स्ववियु वा विद्यार्थी मञ्चहरु हुन्छन्, जसले विद्यार्थीको हकहितका साथै विश्वविद्यालयको शैक्षिक गुणस्तर अभिवृद्धिमा रचनात्मक भूमिका खेलेका हुन्छन्।

नेपालकै जेठो विश्वविद्यालय, त्रिभुवन विश्वविद्यालयमा पनि स्वतन्त्र विद्यार्थी युनियन छ। तर, १४ वर्षदेखि त्यसको वैधानिक अस्तित्व भने छैन। २०६५ सालयता स्ववियु निर्वाचन हुन सकेको छैन। विद्यार्थी संगठनहरुले आगामी फागुनभित्र स्ववियु निर्वाचन गरिसक्न भन्दै त्रिविका विभिन्न निकायको ध्यानाकर्षण गराइरहेका छन्। केही दिन अगाडि मात्रै विद्यार्थी संगठनहरुले त्रिविका उपकुलपति धर्मकान्त बास्कोटालाई भेटेर फागुन १४ भित्रै स्ववियु निर्वाचन गराउन ज्ञापनपत्र पनि बुझाएका थिए।