उपहानगरभित्रकै दुर्गम गाउँको पीडा– अस्पताल पुग्न स्ट्रेचरको भर

दाङ । घोराही उपमहानगरपालिका वडा नं. १, काउलेकी ७३ वर्षीय चुमादेवी खत्री बिरामी परेको ६ दिन भयो । बिरामी पर्नासाथ उनलाई अस्पताल पुर्याउन घर परिवारको मन नभएको पनि होइन । तर सडक र सवारी साधनको सुविधा नहुँदा अस्पताल पुग्नै सास्ती हुने भएपछि ६ दिनसम्म उनी घरमै बसिन् ।

पहाडी गाउँ, मोटरबाटो अभावका कारण घण्टौं स्ट्रेचरको सहारामा अस्पतालसम्म पुग्नुपर्ने बाध्यताका कारण उनले समयमै स्वास्थ्य उपचार पाउनबाट बञ्चित हुनुपर्यो । यो बाध्यता चुमादेवीको मात्रै होइन, घोराही बजारदेखि झण्डै १३ किलोमिटर उत्तरतर्फ रहेको काउले गाउँका बासिन्दा यस्तो समस्या झेल्दै आएका छन् । करिव सय घर हाराहारीको बसोबास रहेको यो गाउँमा बिरामी पर्दा सबैले भोग्ने पीडा यही नै हो ।